ربط ماسنجر بمتجر إلكتروني معناه إن رسايل صفحتك على فيسبوك تبقى متوصّلة بالمنتجات والأسعار والطلبات. العميل يسأل، ويشوف المنتج، ويطلب في نفس المحادثة، من غير ما تنقل حاجة بإيدك. الربط في ستورك بلس بياخد دقايق، والدليل ده ماشي معاك خطوة بخطوة.
- لازم تكون أدمن على الصفحة.
- لازم توافق على صلاحية pages_messaging في نافذة فيسبوك.
- الخطوات: افتح شاشة البوت، اربط فيسبوك، اختار الصفحة، ظبّط القائمة، جرّب بنفسك.
- لو البوت ساكت بعد الربط: غالباً صلاحية اتشالت، أو الصفحة مربوطة بمتجر تاني ليك.
قبل ما تبدأ: اتأكد من حاجتين
- إنك أدمن على الصفحة: لو إنت محرر أو معلن بس، الصفحة مش هتظهر في القائمة.
- إنك هتوافق على كل الصلاحيات: خصوصاً pages_messaging. من غيرها مفيش رسالة هتوصل، ودي أشهر سبب الناس بتفتكر بيه إن الربط فشل.
خطوات الربط
الخطوة 1: افتح شاشة البوت
- من لوحة تحكم متجرك، روح لـ البوتس ← مسنجر.
- هتلاقي شاشة «اعدادات البوت» فيها 3 تبويبات: الربط، والقائمة المستمرة، ومساعد الذكاء الاصطناعي.
الخطوة 2: اضغط «الربط بالفيسبوك»
- هيفتحلك تسجيل دخول فيسبوك.
- سيب كل الصلاحيات متعلّم عليها، خصوصاً إدارة الرسايل وعرض الصفحات.
- لو شيلت واحدة، ارجع واعمل الربط تاني.
الخطوة 3: اختار الصفحة واضغط «اربط البوت»
- هتلاقي صفحاتك في قائمة. اضغط «اربط البوت» جنب الصفحة اللي عايزها.
- لو ظهرت «لا يوجد صفحات للربط»، يبقى الحساب ده مش أدمن على أي صفحة. سجّل بحساب تاني.
الخطوة 4: ظبّط القائمة ونبرة الردود
- القائمة المستمرة: الأزرار الثابتة اللي العميل بيشوفها، زي عرض المنتجات والسلة وإتمام الشراء.
- مساعد الذكاء الاصطناعي: تكتب تعليمات بنبرة متجرك (من باقة نمو).
الخطوة 5: جرّب بنفسك قبل العملاء
من حساب فيسبوك تاني:
- ابعت رسالة للصفحة واسأل عن منتج بالاسم.
- ضيفه للسلة.
- كمّل طلب حقيقي.
الخطوة دي بتكشف أي مشكلة في دقيقتين، بدل ما تكتشفها من عميل.
البوت مربوط بس مش بيرد؟ أشهر سببين
السبب 1: الصفحة مش مشتركة في التطبيق
- فيسبوك مش بيبعت رسايل الصفحة غير لو الصفحة مشتركة في التطبيق.
- ده بيحصل أوتوماتيك وقت الربط، بس لو صلاحية اتمنعت، الاشتراك مش بيتم.
- الحل: الغي الربط، واعمله تاني، وسيب كل الصلاحيات.
السبب 2: الصفحة بترد من متجر تاني ليك
- لو عندك أكتر من متجر على نفس حساب فيسبوك، ممكن تكون ربطت نفس الصفحة في الاتنين.
- فيسبوك بيبعت الرسالة مرة واحدة، فمتجر واحد بس هو اللي بيرد.
- في شاشة البوت هتلاقي مكتوب إن الصفحة «بترد من متجرك التاني»، ومعاها زرار تنقل بيه الرسايل للمتجر ده.
الربط ده بيفرق في إيه؟
- رد في ثواني بدل ساعات: اللي بيسأل «بكام؟» جاهز يشتري.
- الطلب بيتسجّل في المحادثة: بالعنوان، ويوصل لنفس لوحة طلبات الموقع.
- إشعارات أوتوماتيك: العميل بيتبلّغ لما الطلب يتسجل ولما يتشحن (من باقة نمو).
بوت الماسنجر موجود في كل الباقات: بداية المجانية فيها 100 رد ذكي في الشهر، ونمو بـ 899 جنيه فيها 3,000 رد. وكلها بصفر عمولة. شوف الباقات.
أسئلة شائعة
إزاي أربط ماسنجر بمتجري الإلكتروني؟
من لوحة تحكم ستورك بلس روح لـ البوتس ← مسنجر، اضغط «الربط بالفيسبوك» ووافق على كل الصلاحيات، وبعدين اختار الصفحة واضغط «اربط البوت».
ليه البوت مش بيرد بعد ما ربطت الصفحة؟
أشهر سببين: صلاحية pages_messaging اتمنعت وقت الربط فالصفحة مش مشتركة في التطبيق، أو نفس الصفحة مربوطة بمتجر تاني ليك وبترد منه. الحل إنك تعيد الربط بكل الصلاحيات أو تنقل الرسايل للمتجر الصح.
ليه صفحتي مش ظاهرة في قائمة الربط؟
لأن الحساب اللي سجّلت بيه مش أدمن على الصفحة. لازم تكون أدمن، مش محرر أو معلن.
